«الأندية التانية هى اللي عملتك وكبرتك».. رسائل نارية من خالد الغندور لـ إمام عاشور

وجه خالد الغندور، نجم الزمالك السابق، رسائل نارية إلى إمام عاشور، لاعب خط وسط الفريق الأول لكرة القدم بالنادي الأهلي، وذلك بسبب بيان اعتذاره للاعبي والجهاز الفني للفريق الأحمر.

كان إمام عاشور، كتب عبر الاستوري الخاص به على إنستجرام: «أولًا كل الاحترام والتقدير لزمايلي ولكل منظومة الفريق من الكبير للصغير، وأنا بعتذر عن أي خطأ زعل حد مني، ومتقبل للعقوبة وده شيء طبيعي. لأن الفرق كبير أوي بين هنا وأي حتة تانية، للأسف فاكرين بالفبركة على السوشيال والتصريحات الكذب على لسان أخويا ممكن يأثروا على علاقتي بالأهلي وجمهوره.. ده مش هيحصل. أنا فخور بالأهلي وممتن جدًّا بدعم ومساندة جمهور الأهلي أعظم جمهور في الكون، وبإذن الله طموحاتي وأحلامي هتتحقق هنا في الأهلي».

وقال خالد الغندور، لـ إمام عاشور، خلال برنامج «ملعب أون تايم»، المذاع عبر فضائية «أون تايم سبورتس»: «إنت بتلعب في النادي الأهلي، ده نادي كبير جدًا ومن أكبر في أفريقيا. حتى وهو بيعتذر بيغلط! حتى وهو بيعتذر بيلقح على نادي الزمالك! ليه يا إمام، عايز تخسر الناس؟ إنت بتلعب في الأهلي بيديك فلوس ونجومية وبتعمل إعلانات».

وأضاف: «انت فاكر إن نجاحك مع جمهور الأهلي هو التريقة على ناديك اللي صنعك واللي عملك وخلاك بني أدم وخلاك مشهور وتروح المنتخب، إنت كنت أساسي في منتخب مصر من خلال نادي الزمالك ولعبت في الأوليمبياد من خلال نادي الزمالك، واحترفت في الدنمارك من نادي الزمالك».

وأتم: «انت الأندية التانية هي اللي عملتك وكبرتك، انت فاكر انك هتتنجم في الأهلي لما تقلل من الزمالك؟ هتتنجم لما تكون ملتزم وتحقق بطولات وتسجل أهداف، النجومية مش على السوشيال ميديا ومش إنك تغني أغاني الأهلي ويعتبروك أهلاوي، هيعتبروك أهلاوي لما تكسر الدنيا في الملعب».