«اللاعيبه خدت عليك».. رسالة نارية من إبراهيم سعيد لـ عبدالواحد السيد بعد أزمة مصطفى شلبي

علق الإعلامي إبراهيم سعيد، على أزمة مصطفى شلبي لاعب نادي الزمالك في مباراة بلاك بولز الأخيرة بعد استبداله، مشيرًا إلى الأزمة كانت مع مع عبدالواحد السيد مدير الكرة.

وقال إبراهيم سعيد في تصريحات تليفزيونية عبر برنامجه المذاع على شاشة «النهار»: «المشكلة باينه أنها كانت بين مصطفى شلبي وعبدالواحد السيد، ولو كان في أزمة بينه وبين لعيب تاني كان مفروض تاخد عقوبة».

وأضاف: «لو سمحت ياريت الناس تحترم عقولنا، وبتصريحاتك كدة انت بتأكد أن الأزمة معاك، ودي مش نرفزة ملعب زي مقولت دي نرفزة دكة، ولو كانت أزمة مع لعيب زميلة كان لازم تاخد عقوبة، وشوف الأهلي عمل أية مع إمام عاشور».

وأكمل: «بلوم على عبدالواحد السيد أنه أخد اللعيبة عليه فيستحمل بقى، مش حلو أن مدير الكرة يبقى قريب من اللعيب، ده بالعكس مفروض اللعيب ميعرفش يوصلك كدة بس، ومينفعش يتعامل كأنه لعيب، وعشان كدة اللعيبة أخدت عليك».

وأردف: «كانت باينة جدًا أن مصطفى شلبي بيشوحلك وبيقولك متتكلمش معايا، فمينفعش اللعيب يعاملك كأنه صاحبك صاحبه، والقرار كان لازم يبقى عقوبة سريعة زي مشوفنا في إمام عاشور».

وأتم إبراهيم سعيد تصريحاته قائلًا: «بتمنى عبدالواحد السيد يفصل بينه وبين اللعيبة، واللعيب نمرود ولو لقى مدير الكرة شخصيته ضعيفة مش هيحترم وجهة نظرك، وهيشوحلك، والسبب أنك فقدت الشخصية قدام اللعيب فمترجعش تشتكي».