«باع الزمالك ودوره مع جوميز مترجم».. هجوم ناري من إبراهيم سعيد على موقف أحمد مجدي

شن الإعلامي إبراهيم سعيد، هجومًا ناريًا على أحمد مجدي مدرب الزمالك، بسبب استمراره مع الفريق حتى مباراة المصري البورسعيدي القادمة، مشيرًا إلى أنه باع الزمالك وكان على علم برحيل جوميز.

وقال إبراهيم سعيد في تصريح تليفزيوني عبر شاشة «النهار»: «هل تواجد أحمد مجدي هو اللي هيخلي اللعيبه تتمرن بجدية، أكيد لأ عشان اللعيبة مش هتحس باستقرار ولا القائد المدير الفني اللي بيعمل حته الاستقرار».

وأضاف: «مفروض مين اللي يحاسب لعيبه الزمالك لما تغلط، أحمد مجدي اللي ماشي بعد مباراة المصري، أنا لو مكان اللعيبة وكلمني أو غلطني هقوله انت ماشي».

وأكمل: «أحمد مجدي كان في جهاز جوميز وعارف أنه ماشي معاه، مجلس الإدارة بيكافآه؟ ومحدش يقوله إنه مكنش يعرف».

وأكمل: «من الواضح جدًا علاقته القوية مع جوميز، وهو شغلته كانت ترجمه وأي باد، ولكن كشغل فني مأضفش حاجة لنادي الزمالك».

وأردف: «أحمد مجدي باع الزمالك، وكان يعرف من ساعة ما التفاوض بدأ، لأن بالتأكيد جوميز أبلغه عشان يبقى مستعد، وهو مريح بالنسباله وبالتالي قاله».

وزاد: «إزاي مجلس الزمالك يآمن لـ أحمد مجدي على الفرقه، ده تلاقيه بيكلم جوميز يقوله هتبعت الفيزا إمته عشان أسافر ومخدتنيش معاك ليه، ولا فارقه معاه الزمالك يكسب أو يخسر».

وأتم إبراهيم سعيد تصريحاته قائلًا: «علامة استفهام كبيرة بالنسبالي إزاي يبقي على أحمد مجدي مع الجهاز الفني، ومينفش مجلس الإدارة يتنازل على حساب نادي الزمالك، ومع احترامي كان في حد يعرف أحمد مجدي لولا الزمالك اللي دخله مجال التدريب».