«حملات موجهة».. شوبير عن الهجوم على مسؤولي الأهلي بعد خسارة باتشوكا

انتقد الإعلامي أحمد شوبير حارس مرمى الأهلي ومنتخب مصر السابق الهجوم العنيف على مسؤولي الأهلي ومجلس الإدارة عبر وسائل التواصل الاجتماعي والسوشيال ميديا منذ خسارة الأهلي أمام باتشوكا المكسيكي في نصف نهائي كأس الإنتركونتيننتال.

وقال أحمد شوبير في تصريحات إذاعية: «أنا الحقيقة مش عاجبني هذا الكم من الهجوم الشرس والعجيب والغريب وناس بدأت تتكلم على حاجة حصلت من سنتين وشوية يقولوا حرام عليكم ومش عارف أيه».

وأوضح شوبير: «خلاص أنت خسرت وأنت في محنة ومحتاج جماهيرك عشان تساندك وتخرجك من اللي أنت فيه، إنما أيه الحملات الغريبة دي وأيه الحملات العجيبة دي وأيه الحملات الموجهة دي فيه أيه».

وأضاف شوبير: «أنا موجود في المغرب عشان أحضر حفل الكاف للأفضل في أفريقيا، فالحقيقة استغربت قوي كمان من اللي بيحصل عندنا، الناس هنا تقدير كبير للأهلي وزعلانيين جدا لخسارته وكلهم يقولوا لي أيه الأهلي ده وأيه عظمته دي ودخوله في مصاف الأندية العالمية الكبيرة، وأحد نجوم أفريقيا الكبار قال لي ده باتشوكا كان مرعوب من الأهلي فكلام محترم جدا عن النادي الأهلي».

واختتم شوبير: «فيا جمهور الأهلي قلت لك ازعل بس زعلك ميبقاش بالشكل ده ومش بحالة الانفجار ده على السوشيال ميديا الأمر مبالغ فيه وناس بتهاجم أعضاء في مجلس الإدارة، ما كل مسؤولي الأهلي كانوا بعد المباراة زعلانيين وغضبانيين جدا، أنا بقول لك ازعل بس اعرف قيمة ناديك وأقف جنبه عشان السنة اللي جاية يبقى في النهائي».