شريف عبدالفضيل: رحيل كولر عن الأهلي يهد استقرار الفريق.. وهذا ما ينقصه

عبر شريف عبدالفضيل، نجم النادي الأهلي السابق، عن رأيه في أداء المارد الأحمر تحت القيادة الفنية لـ السويسري مارسيل كولر، خلال مباريات الفريق الماضية، مشيرًا إلى أن السويسري يحتاج إلى أن يتعامل نفسيًا مع اللاعبين في الفترة المقبلة.

وخسر الأهلي أمام بلوزداد بهدف نظيف، في المباراة التي جمعت بينهما على ملعب الأخير، ضمن منافسات الجولة الرابعة من البطولة الأفريقية.

وقال عبدالفضيل في تصريح تليفزيوني عبر شاشة «إم بي سي مصر 2»: «مش عايزين نقسو على كولر، بس هو محتاج يتعامل بشكل نفسي مع اللعيبة أكتر من كدة، وبعدين جديد علينا أن أطلع في تصريح بعد ماتش إنبي وأقول بعض اللعيبة قصرت».

وأضاف نجم الأهلي السابق: «دايمًا المدرب هو اللي كان بيتحمل المسؤولية الكاملة في حالة الخسارة وبيحمي لعيبته، وبعدين في الغرف المغلقة يتم التعامل نفسي أو فني معهم».

وأكمل: «كذا لعيب طلع الفترة اللي فاتت بيقول إن الراجل مش بيتكلم معايا، ومفروض ده مش صح لازم يقرب من اللعيبة ويتكلم مع كل لعيب على حدى».

وأردف شريف عبدالفضيل: «رغم الكلام ده، لو جينا قيمنا كولر دلوقتي طبعًا ميمشيش ومينفعش أهد استقرار الفريق، ومفيش حاجة في الأهلي اسمها أمشي مدير فني في الوقت الحالي، واحد حقق بطولات وإنجازات كبيرة».