شوبير: «محدش عايز يعترف بأنه خسر مباراة لإنه وحش والتطبيل وشماعة التحكيم جاهزين علطول»

وجه الإعلامي أحمد شوبير حارس مرمى الأهلي ومنتخب مصر السابق رسالة نارية بخصوص ما يدور في كرة القدم المصرية محذرا من عواقب وخيمة على بعض الأندية والمسؤولين عنها بسبب المكابرة وعدم العمل بشكل منهجي صحيح.

وقال أحمد شوبير: «يا جماعة إلى متى هنفضل نفهم الناس إن لما نخسر إحنا مش غلطانيين دائما البحث عن شماعة أسهل حاجة ومواجهة النفس أصعب حاجة، لكن لو انت صادق مع نفسك وشفت عيوبك وحاولت تصلحها هتنجح رحم الله إنسان أهدى إلىّ عيوبي ده صديق تتمناه من كل قلبك يكون موجود».

وأوضح شوبير: «مشكلتنا والله اللي هم بيسموه دلوقتي التطبيل طول الوقت يا جميل يا عظيم يا سلام عليك يا أبوالكباتن هو أيه المانع إني ألعب ماتش وحش أو أخد قرار غلط إحنا مش أنبياء الجدعنة إن أنا أصلح دائما من أخطائي لكن طول ما الأمر أصل فلان اللي غلطان أصل الحكام بيظلومنا أصل أصل يا عم شوف اخطائك وعالجها».

وتابع شوبير: «أنا لما أطلّع عيل صغير عنده 8 سنيين وأطلعه عنده شعور المظلومية وإن الحكم هو اللي بيخسره لما الولد ده هيطلع من صغره كده ويتعود على كده عمره ما هيعترف بغلطه وهيفضل طول الوقت يدور على شماعة».

وأضاف حارس الأهلي السابق: «أنا شخصيا مش بيفرق معايا الحملات اللي عليّ لا من قريب ولا من بعيد بس أنت بتقنع الناس بحاجات مش صح، وأنا بكلم بكل أمانة على الكورة ويطلع مسؤول يقول لك أنا أصل بتعرض لظلم من 8 سنيين ومش عارف أيه، والله العظيم أنتوا اللي هتندموا في الآخر لإن أنت مش هتعرف تربي جيل وهتعمل لنفسك مشاكل كبيرة وعنيفة».

وأردف شوبير: «حضرتك هتعمل حملات ومش عارف أيه، أعمل زي ما أنت عايز بس ده أكبر غلط، ما تيجي تحدد عندي سلبيات كذا وإيجابيات كذا علموا الأولاد من صغرهم الصدق والحقيقة وإنه لازم يغلط عشان يتعلم وإن مش كل حاجة هيعملها هتبقى صح، علموا الأولاد من صغرهم يكون لهم قدوة حسنة إحنا داخلين على مرحلة صعبة جدا، العالم كله بيجري ويطيروا وعندنا أجيال كثيرة في مصر ناجحة وهيبقوا عباقرة لكن عندنا في كرة القدم أزمات ومشاكل محدش عايز يبقى غلطان محدش عارف يعترف إنه خسر مباراة لإنه وحش محدش عايز يقول للناس إن تخطيطي هنا مكنش سليم وإني هطور من نفسي وأعدل من نفسي».

واختتم شوبير: «أنا طول ما بخلق للولد مبررات يبقى مفيش جيل هيطلع كويس عشان إحنا داخلين في منعطف شديد الخطورة وربنا يستر وبجد الواحد مستغرب من اللي بيحصل واللي هيحصل في المستقبل كمان».