«كارثة وخسارة».. هجوم ناري من إبراهيم سعيد على مجلس الزمالك بسبب رحيل جوميز

قال الإعلامي إبراهيم سعيد، إن الأزمات لسه مستمرة في الزمالك، والمشاكل مبتنتهيش، ورحيل جوزيه جوميز المدير الفني للأبيض خسارة، وطبيعي الزمالك الفترة الجاية هيدفع الثمن، ودي الحاجات اللي بتأثر على نادي الزمالك.

وأضاف سعيد في تصريحات تليفزيونية عبر شاشة «النهار»: «توقيت رحيل جوميز مش مناسب في وقت الزمالك بيدور على الاستقرار، لسه الموسم بيبدأ والمدير الفني يمشي، ونبدأ نخش في حسبه برما، وهيبقى في عدم استقرار وتخبط الفترة الجاية».

وأضاف: «بعتب على مجلس الإدارة عشان أهم عنصر عندك كان المدير الفني، لأن كرة القدم هي أساس نجاح أي نادي، والجمهور بيهتم باللعبة الشعبية الأولى في مصر».

وأكمل: «عايز أعرف ليه جمهور الزمالك ليه بيعتب على جوميز، المفروض العتاب يكون على مجلس الإدارة أنه معرفش يتعامل مع الملف ده، واللي المفروض كان يبدأ الكلام من بعد الكونفدرالية».

وأشار إلى أن مجلس الإدارة منفذش طلبات جوميز، ولا مرتبات اللاعبين خلصت، ومتأكد أن جوميز بيجهز للرحيل من شهرين، وجوميز جاب مايه معدنية على حسابه للاعيبه بـ10 ألاف جنيه، هل ده يصح؟، دي كارثة.