«مش وفي واتهاجمت كتير عشانه».. محسن صالح يفتح النار على عصام الحضري

فتح محسن صالح، المدير الفني الأسبق لمنتخب مصر، النار على عصام الحضري، حارس مرمى الأهلي ومنتخب مصر السابق.

وقال محسن صالح، في تصريحات تلفزيونية عبر فضائية «الأهلي»: «أنا حزين من عصام الحضري، انا اتهاجمت كتير عشانه، لكن بيحاول ينكر أفضالي عليه وأنا مش عارف ليه يعني! يشوف الكابتن فكري صالح، يقول هو اللي اكتشفني، كان يقابل الراحل حسن مختار، يقول هو اللي اكتشفني».

وأضاف: «أنا عانيت عشان أجيب عصام الحضري، والناس كلها كانت مستغربة من القرار»، موضحًا: «الحضري، أنا روحت اتفرجت عليه في مباراة دمياط وبورفؤاد، عندما كنت مديرًا فنيًا للمنتخب الأول، توسمت إن فيه المواصفات المطلوبة لحراسة المرمى، بدأت أتابعه وجمعت عنه معلومة، وخليت حسن مختار (مدرب حراس مرمى المنتخب الأسبق)، يروح يشوفه والتقارير كلها كانت في صالحه».

وتابع: «اللي بياخد قرار ضم واستبعاد لاعبين المدير الفني مش المهندس هاني أبوريدة، عصام الحضري، من يومين قال المهندس هاني أبوريدة راح جابني من دمياط، هاني أبوريدة، مكنش يعرفه، أنا من ضميته لمعسكر المنتخب الأول، بعدها كلمت هاني أبوريدة ورود كرول، ورشحت عصام الحضري، للمنتخب الأولمبي».

وأكمل: «بعد ما ضميته للمنتخب، تواصلت مع ثابت البطل ورشحته للانضمام للأهلي»، مضيفًا: «في 2002 مستوى عصام الحضري، كان هابط، فاستبعدته من المنتخب، طلع هاجمني بعنف في الجرائد، فاستغربت، بعدها بيومين لاقيته بيكلمني بيقولي (والله يا بابا ما قولت حاجة، ده هما اللي كاتبين)».

وأتم: «حزنت من عدم وفاء عصام الحضري، يعني بعد ما وصلت وعملت كل حاجة، إيه اللي يمنع تقول إن أنا اللي اكتشفتك!».